Թերթ.am-ը` աշխարհի բոլոր հայերի համար

Հայ Առաքելական Սուրբ Եկեղեցին հունվարի 5-ին և 6-ին նշում է Հիսուս Քրիստոսի Սուրբ Ծննդյան տոնը:

Սուրբ ծնունդը Հայ առաքելական եկեղեցին սկսում է տոնել հունվարի 5-ի երեկոյան, երբ բոլոր եկեղեցիներում մատուցվում է ճրագալույցի պատարագ: Ճրագալույցի պատարագ տարին ընդամենը 2 անգամ է մատուցվում` Սուրբ Ծննդյան և Սուրբ Հարության տոներին: Ճրագալույց նշանակում է ճրագ (մոմ) լուցանել, այսինքն` վառել: Այդ օրը երեկոյան մարդիկ եկեղեցում վառված ճրագներն իրենց հետ տուն են տանում: Այն խորհրդանշում է աստվածային լույս, եկեղեցու օրհնություն:

Հունվարի 6-ին կատարվում է Ջրօրհնեք, որը խորհրդանշում է Հորդանան գետում Քրիստոսի մկրտությունը: Խաչով և Սրբալույս Մյուռոնով օրհնված հրաշագործ ջուրը բաժանվում է ժողովրդին` ի բժշկություն հոգևոր և մարմնավոր ախտերի:

Սուրբ Ծննդյան տոնակատարությունների շարքում կատարվում է նաև Տնօրհնեքի արարողություն: Հունվարի 7-ը, ինչպես և բոլոր տաղավար տոներին հաջորդող օրերը, հանգուցյալների հիշատակության օր է` մեռելոց: Հունվարի 7-ին` Սուրբ Պատարագից հետո, բոլոր եկեղեցիներում կատարվում է հոգեհանգստյան արարողություն, որից հետո մարդիկ այցելում են հարազատների շիրիմները:
Սուրբ Ծննդյան տոնի հանդիսություններն ավարտվում են հունվարի 13-ին:

Այսօր` ժամը 17:30-ին, հայաստանյայց առաքելական բոլոր եկեղեցիներում կմատուցվի ճրագալույցի տոնական Սուրբ պատարագ` ազդարարելով Սուրբ Ծննդյան ավետիսը: Մարդիկ եկեղեցում վառված մոմերը իրենց հետ տուն կտանեն և կսկսեն տոնել Սուրբ Ծնունդը:

Հունվարի 6-ին` ժամը 11:00-ին, բոլոր եկեղեցիներում կմատուցվի Սուրբ Ծննդյան տոնական պատարագ, որից հետո կկատարվի Ջրօրհնեքի արարողություն: Օրհնված ջուրը կբաժանվի ներկաներին:

Հունվարի 7-ին հանգուցյալների հիշատակության օրն է: Այդ օրը բոլոր եկեղեցիներում կմատուցվի պատարագ, որից հետո կկատարվի հոգեհանգստյան կարգ, այնուհետև մարդիկ կայցելեն հարազատների շիրիմներին:

Հունվարի 13-ին Տիրոջ անվանակոչության օրն է: Այդ օրը ևս բոլոր եկեղեցիներում կմատուցվի պատարագ: (Tert.am)