ՍՏԵՓԱՆԱԿԵՐՏ, 27 ապրիլի. /Նովոստի-Արմենիա/. Լեռնային Ղարաբաղի Հանրապետության արտաքին քաղաքականության և անվտանգության հանրային խորհուրդը կոչ է արել սփյուռքի հայկական կազմակերպություններին նախաձեռնել ԼՂՀ միջազգային ճանաչման գործընթացը։

«Մեր ժողովրդի համար Հայոց ցեղասպանության ճանաչման պես կարևոր խնդրի լուծմանը զուգահեռ հայկական սփյուռքն իր գործունեության հավասար առաջնահերթ ուղղություն պետք է դիտարկի նաև Արցախի Հանրապետության ճանաչումը»,- ասվում է երեք ավանդական կուսակցությունների (Դաշնակցություն, Հնչակյան և Ռամկավար-Ազատական) և սփյուռքի լոբբիստական կառույցներին Խորհրդի ուղղած հայտարարությունում։

Հայտարարության մեջ ընդգծվում է, որ վերջին ժամանակներում Կոսովոյի, Աբխազիայի և Հարավային Օսեթիայի անկախության ճանաչումն այն վկայությունն է, որ ճանաչումը հակամարտության գոտիներում անվտանգության և կայունության ապահովման իրական հնարավորություն է, որը մեծ ջանքեր և ծախսեր է պահանջում։

«ԼՂՀ ճանաչումը նույնիսկ տարածաշրջանային և շրջանային մարմինների կողմից կոգեշնչի և կամրապնդի արցախցիներին, բարոյական և ինստիտուցիոնալ լուրջ խթան կդառնա»,- նշվում է փաստաթղթում։

Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:

Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:

1994թ. մայիսի 12-ին զինադադարի վերաբերյալ եռակողմ համաձայնագրի կնքումից  հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ  ստիպված լքեց բնօրրանը:

Հայաստանի խորհրդարանական ուժերը ողջունում են ԼՂՀ հանրային խորհրդի՝ հանրապետության միջազգային ճանաչման գործընթաց սկսելու նախաձեռնությունը։

Ինչպես news.am-ի թղթակցի հետ զրույցում հայտարարել է «Ժառանգություն» կուսակցության խմբակցության ղեկավար Արմեն Մարտիրոսյանը, այս գործընթացը նույնիսկ ուշացած է։ «Կարծում եմ՝ Լեռնային Ղարաբաղում այս գործընթացն ավելի վաղ պետք է նախաձեռնեին, սակայն մինչ արտասահմանյան խորհրդարաններին դիմելը` Ստեփանակերտն այս հարցը պետք է լուծի Հայաստանի հետ։ Քանի դեռ Հայստանը չի ընդունել ԼՂՀ անկախությունը, ոչ մի երկրի խորհրդարան չի անի դա»,- նկատել է Մարտիրոսյանը։

Հանրապետական կուսակցության նախագահ Գալուստ Սահակյանն իր հերթին եւս ճիշտ է համարել ԼՂՀ հանրային խորհրդի նախաձեռնությունը՝ ընդգծելով, որ եկել է ժամանակը, որպեսզի Լեռնային Ղարաբաղը ինքը կարողանա միջազգային հանրության դեմ հարցեր բարձրացնել։

«Դաշնակցություն» կուսակցության խմբակցության քարտուղար Արտյուշա Շահբազյանն ընդգծել է, որ Հայաստանը բոլոր նախաձեռնություններում պետք է օգնի Ղարաբաղին, եւ եթե Ստեփանակերտը նպատակահարմար է գտել հանդես գալ նման նախաձեռնությամբ, ապա Երեւանն ամեն կերպ պետք է նպաստի դրան։

«Բարգավաճ Հայաստան» կուսակցության խմբակցության քարտուղար Արամ Սաֆարյանը հայտարարել է, որ նախաձեռնությունն ընդհանուր առմամբ ընդունելի է։ Սակայն նա քիչ հավանական է համարել այն, որ մինչեւ ԵԱՀԿ Մինսկի խմբի կողմից ազդանշան ստանալը՝ որեւէ երկրի խորհրդարան կընդունի ԼՂ անկախությունը. «Քանի դեռ ԵԱՀԿ Մինսկի խումբը չի կարծում, որ ղարաբաղյան հակամարտությունը կարող է լուծվել միայն միջազգային ինքնիշխանության հիման վրա, նման բան չի լինի»,- ընդգծել է Սաֆարյանը։