Հայաստանի ֆուտբոլի ֆեդերացիան, հայ ֆուտբոլիստներն ամեն ինչ կանեն, որպեսզի երկիրը մասնակցի «Եվրո-2012» առաջնությանը: Ինչպես tert.am-ի հետ զրույցում նշեց Հայաստանի ֆուտբոլի ֆեդերացիայի նախագահ Ռուբեն Հայրապետյանը, «Եվրո-2012»-ի ընտրական փուլում Հայաստանի հավաքականի հաղթանակը Սլովակիայի թիմի նկատմամբ մեկ անգամ ևս արտացոլեց ծանր ու նպատակասլաց աշխատանքի արդյունքը:

Ընտրական մրցաշարի ավարտից երկու խաղ առաջ Հայաստանը 14 միավորով հավասարվեց Սլովակիայի հավաքականին եւ ընդամենը 3 միավոր է զիջում խմբի առաջատար Ռուսաստանին, որը 0:0 հաշվով ավարտեց հանդիպումը Իռլանդիայի հետ եւ ունի 17 միավոր: Իռլանդիան 15 միավորով երկրորդ տեղում է: Հայաստանը երրորդն է: Խմբում առաջին տեղ գրաված թիմը նվաճում է եզրափակիչ մրցաշարի ուղեգիր: Երկրորդ տեղ գրաված հավաքականն անցումային խաղերում վիճարկում է երկրորդ ուղեգիրը: