Եվրոպայի Հայերի Համագումարը դատապարտել է Թուրքիայի վարչապետ Ռեջեփ
Էրդողանի Լոնդոնում արած հայտարարությունը, ըստ որի` անհրաժեշտության
դեպքում Թուրքիայից դուրս կհանի Հաայաստանի 100 հազար քաղաքացիների, որոնք
անօրինական ապրում եւ աշխատում են այնտեղ:
«Այս փաստը նույնպես գալիս է ապացուցելու, որ նաեւ ժամանակակից
Թուրքիայում տիրում է այլատյացություն, մասնավորապես անհանդուրժող
վերաբերմունք հայ ժողովրդի նկատմամբ: Զարմանալի է, որ նման հայտարարությամբ
հանդես է գալիս մի պետության ղեկավար, որի քաղաքացիներից մի մեծ զանգված,
որպես ապաստանյալներ եւ գաղթականներ, ապրում են եվրոպական երկրներում:
Առավել զարմանալի է նաեւ այն առումով, որ նման դիրքորոշում եւ մոտեցում
ունեցող մի երկիր ձգտում է դառնալ եվրոպական ընտանիքի անդամ»,- նշել են
հայտարարության հեղինակներն ու հայտարարել. «Կոչ ենք անում Եվրոպայի
համապատասխան մարմիններին դատապարտել այս հայտարարությունը եւ անհրաժեշտ
քայլեր ձեռնարկել Թուրքիայում տիրող մարդու իրավունքների եւ այլ
ժողովուրդների նկատմամբ անհանդուրժողականության նկատմամբ: Կոչ ենք անում
նաեւ Եվրոպայի բոլոր պետություններին ստանձնելու համամարդկային իրենց
պարտականությունը եւ դատապարտելու Ցեղասպանության ոճիրն ու ճանաչելու Հայոց
Ցեղասպանության իրողությունը»: NEWS.am
Էրդողանը մեղադրել է ԶԼՄ-ներին իր խոսքերը խեղաթյուրելու
մեջ
Թուրքիայի վարչապետը մեղադրել է ԶԼՄ-ներին Թուրքիայում բնակվող հայ
միգրանտներին վտարելու մասին իր խոսքերի իմաստը խեղաթյուրելու մեջ: Ինչպես
նախօրեին հայտարարել է Էրդողանը, ԶԼՄ-ները ճիշտ չեն մեկնաբանել իր խոսքերը,
տեղեկացնելով, թե, իբր, նա սպառնացել է վտարել Թուրքիայում գտնվող բոլոր
հայերին:
Ամերիկայի ձայնը հաղորդում է, որ թուրքական կառավարության ղեկավարն ընդգծել
է, թե իր մտքերը վերաբերում էին միայն ապօրինի միգրանտներին:
Հիշեցնենք, որ Բի Բի Սի-ի թուրքական ծառայության լրագրողի հետ զրույցում
Էրդողանն ասել էր, որ Թուրքիան կարող է վտարել շուրջ 100 հազար`
Թուրքիայում ապօրինի գտնվող հայերին: Այդ հայտարարությունը հաջորդել էր
նրան, որ շվեդական և ամերիկյան օրենսդիրները բանաձև են ընդունել, որով 1915
թվականին Օսմանյան կայսրությունում հայերի ոչնչացումը որակվել է որպես
Ցեղասպանություն: Թուրքական վարչապետը հայտարարել էր, որ Թուրքիայում ապրող
շուրջ 170 հազար հայերից միայն 70 հազարն են Թուրքիայի քաղաքացիներ: ԱՅՍՕՐ
(Aysor.am)