«Ղարաբաղի խնդիրը շատ հին է եւ շատ բարդ։ Ադրբեջանն ու Հայաստանն այն ժամանակ մեղադրում էին ինձ այն բանում, որ ես պաշտպանում եմ կողմերից մեկին, բայց դա այդպես չի եղել»,- «Կոմերսանտ» թերթի հետ օնլայն հարցազրույցի ժամանակ հայտարարել է ԽՍՀՄ նախկին նախագահ Միխայիլ Գորբաչեւը։

«Ես չգիտեմ՝ ինչ կարելի է անել։ Հեղաշրջման ժամանակ եւ դրանից հետո որոշվեցին ներքին եւ արտաքին սահմանները, կիսվեցին հողերը։ Ընդ որում, կիսվեցին այնպես, որ հարեւանները կախման մեջ լինեն միմյանցից, որպեսզի առճակատումը միշտ առկա լինի, իսկ Մոսկվան հանդես գա իբրեւ դատավոր։ Խնդիրներ ծագել են բոլոր ժամանականերում ՝ պատերազմից առաջ, պատերազմից հետո»,- հայտարարել է Գորբաչեւը։

Ինչպես նշել է Գորբաչեւը, նա միշտ ասել է, որ ազգային հողի վրա ծագած նմանատիպ հակամարտությունները չեն կարող լուծում ունենալ, «եթե ինչ-որ մեկը հաղթող լինի, իսկ մյուսը՝ պարտվող»։ Նրա կարծիքով, որպեսզի խնդիրը լուծվի, երկու կողմերն էլ պետք է կոնսենսուս գտնեն. «Հնարավոր է, երբ միացյալ Եվրոպա լինի, հանգույցն ավելի հեշտ կլինի բացել»։ (NEWS.am) 

Համայն Ռուսիո պատրիարքը մարտի 16-18-ը կլինի Հայաստանում

03.03.2010

Մարտի 2-ին, Մայր Աթոռ Սուրբ Էջմիածնում Գարեգին Բ Ամենայն Հայոց կաթողիկոսի նախագահությամբ գումարվել է Գերագույն Հոգեւոր խորհրդի նիստ, որի ընթացքում նշվել է, որ Գարեգին Բ-ի հրավերով մարտի 16-18-ը պաշտոնական այցով Հայաստան է ժամանելու Մոսկվայի և Համայն Ռուսիո պատրիարք Կիրիլ Առաջինը:

Մարտի 16-ին Սուրբ Էջմիածնի Մայր Տաճարում կկատարվի Կիրիլ պատրիարքի բարիգալստյան արարողությունը, ապա Սերգիեւ Պոսադ և Էջմիածին քաղաքների միջեւ համաձայնագիր կկնքվի` որպես քույր քաղաքներ: Այնուհետև երկու հովվապետերը ծաղկեպսակ կդնեն 1826-1828թթ. ռուս-պարսկական պատերազմում զոհված ռուս զինվորների հուշակոթողին, որ գտնվում է Էջմիածնից դեպի Օշական ճանապարհին:

Մարտի 17-ին նախատեսվում է այց Ծիծեռնակաբերդ, Հայոց Ցեղասպանության թանգարան և ծառատունկ՝ «Հիշողության» պուրակում: Նույն օրը Ամենայն հայոց կաթողիկոսն ու Համայն Ռուսիո պատրիարքը կայցելեն Քանաքեռի Սուրբ Աստվածածին ռուսական եկեղեցի, որտեղ հանդիպում կունենան Հայաստանի ռուսական համայնքի ներկայացուցիչների հետ: Ապա Երևանի Սուրբ Գրիգոր Լուսավորիչ մայր եկեղեցում տեղի կունենա գոհաբանական աղոթք: Մարտի 17-ին երկու Եկեղեցիների պետերը հանդիպում կունենան նաև ՀՀ նախագահ Սերժ Սարգսյանի հետ:

Մարտի 18-ին ծրագրված է Երևանի ռուս ուղղափառ եկեղեցու հիմնարկեքի արարողություն, գրքերի հայերեն թարգմանությունների շնորհանդես Երևանի պետական համալսարանում և երկու գահակալների հանդիպում ուսանողների, մտավորականների և լրատվամիջոցների ներկայացուցիչների հետ: Նույն օրը Մայր Աթոռում տեղի կունենա համատեղ հայտարարության ստորագրում, ապա հրաժեշտի արարողությամբ կավարտվի Մոսկվայի և Համայն Ռուսիո պատրիարքի այցը Հայաստան: (NEWS.am)