PanARMENIAN.Net - 1988 թվականի փետրվարի 20-ին
տեղի ունեցավ ԼՂԻՄ-ի Ժողովրդական պատգամավորների խորհրդի 20-րդ գումարման
արտահերթ նստաշրջանը, որտեղ ընդունվել է հետևյալ որոշումը. «Ադրբեջանական
ԽՍՀ և Հայկական ԽՍՀ Գերագույն խորհրդների առջև ԼՂԻՄ-ը Ադրբեջանական ԽՍՀ
կազմից Հայկական ԽՍՀ տեղափոխելու վերաբերյալ միջնորդության մասին»:
Լսելով և քննարկելով ԼՂԻՄ Ժողովրդական պատգամավորների խորհրդի ելույթները
Ադրբեջանական ԽՍՀ և Հայկական ԽՍՀ Գերագույն խորհրդների առջև ԼՂԻՄ-ը
Ադրբեջանական ԽՍՀ կազմից Հայկական ԽՍՀ տեղափոխելու վերաբերյալ
միջնորդության մասին, միաժամանակ միջնորդեց ԽՍՀ Գերագույն խորհրդի առջև
հարցին դրական լուծում տալու վերաբերյալ:
Ընդառաջելով ԼՂԻՄ
աշխատավորների ցանկություններին, խնդրել Ադրբեջանական ԽՍՀ և Հայկական ԽՍՀ
Գերագույն խորհրդներին ըմբռնումով մոտենալ Լեռնային Ղարաբաղի հայ
բնակչության իղձերին և լուծել ԼՂԻՄ-ը Ադրբեջանական ԽՍՀ կազմից Հայկական ԽՍՀ
տեղափոխելու հարցը:
Մեկ շաբաթ անց ադրբեջանական Սումգաիթ քաղաքում
Ադր. ԽՍՀ իշխանությունները հայ բնակչության ջարդ կազմակերպեցին, որի
արդյունքում, ըստ պաշտոնական տվյալների, զոհվեց 23 հոգի, հարյուրավոր
մարդիկ ստացան վնասվածքներ:
1990 թվականի սեպտեմբերի 2-ին Լեռնային
Ղարաբաղը անկախություն հռչակեց և դուրս եկավ Ադրբեջանի կազմից: Ղարաբաղյան
շարժման արդյունքում ստեղծվեց անկախ Արցախի Հանրապետությունը: